Luk 9 | IPI | STEP | Jisasato balana disaipolo alesa tupa ipulupa lea-kola, utupane epo amunguli peainipia. Amunguli peai-kola, Jisasato wandakali siki pelene tupa mo atu yolane tai-lene okola, sipitisa koo tupa peyo wata olane tai-lene okola, tai-lene okonelapo utupanenga mayaepia.

a 9:3-5Lk 10:4-11

b 9:7-9Mt 16:14; Mk 8:28; Lk 9:19; 23:8

c 9:19Lk 9:7-9

d 9:20Jo 6:68-69

e 9:21-22Lk 9:44; 18:31-33

f 9:23-26Mt 10:32-33,38-39; Lk 12:8-10; 14:27; 17:33; Jo 12:25

g 9:28-32Lk 9:21-22; 2Pi 1:16-18

h 9:35Lk 3:18-22

i 9:43b-44Lk 9:21-22

j 9:45Lk 18:34

k 9:46Lk 22:24

l 9:48Mt 10:40

m 9:50Mt 12:30; Lk 11:23

n 9:542Ki 1:9-16

o 9:611Ki 19:20

Luke 9

Jisasato Balana Disaipolo Alesa Tupa Piape Pulu Pulupa Leane Oko

Matiyu 10:5-15, Maki 6:7-13

1 Jisasato balana disaipolo alesa tupa ipulupa lea-kola, utupane epo amunguli peainipia. Amunguli peai-kola, Jisasato wandakali siki pelene tupa mo atu yolane tai-lene okola, sipitisa koo tupa peyo wata olane tai-lene okola, tai-lene okonelapo utupanenga mayaepia. 2 Maiyu, utupane-mane wandakali siki pelene tupa mo atu yoto, Goteto pitaka taka ando atalane leakale nembo toto, balato utupane pulupa leaipia. 3 Pulupa loto, balato utupane lamawuato, yakamato nuupi, munipi, tomopi, okonetaka mindi mandi napene, kalango mindi ai napene, singilisa mindiki angu piyu, pulupape leaipia. ^a

4 Yakamato tano mindina polai-angi, wandakali mindimane yakama yatawa paleaindo, yakamato anda mindina pali-pali napene, anda mindiki okonena angu palu atoto, epoko puato, piape pua atalapape. 5 Yakamato tano mindina polai-kola, wandakali tupamane yakamana pii lolai tupa ale naene, yakama yatawa pali napeaindo, yuu okonena atalaini wandakali yakama tane koo mindi piyama ya lo nembo teakalenga, yakamana sukeenga yuu kangalamu atolane tupa tanda lo tepa alu, yakama yuu waka mindina pulupape. 6 Jisasato wuane lea-kola, alesa akali utupane-mane tano tupa pitakana puku puato, Gotena pii layene epene oko wandakali tupa lamaita, wandakali siki pelene tupa mo atu yaka pua ateainipia.

Etoteto Nembo Kambua Teane Oko

Matiyu 14:1-2, Maki 6:14-16

7 Jisasato metekolo piape tupa pua atea-kola, wandakali minditupa-mane andoto, potopesa akali Ilainja bala ati kenga atala, yuunga peke loto, piape pua atalua leainipia. Wandakali minditupa-mane Jisasa bala potopesa akali wamba ateaini tupana waka mindi malinga ika loto, piape pua atalua leainipia. Wandakali minditupa-mane ipa peya-maiyane akali Jone bala malinga ika loto, metekolo piape tupa pua atalua leainipia. Wuane leai-kola, Galili disitiki oko ando atalane akali Etoteto pii utupane ale wato, nembo kambua toto, wamba nambato Jonena maa pai lewa-ko. Andipa apito metekolo piape utupane pua ateya-kola, nambato pii temane utupane ale eyope leaipia. Wuane lalu, balato Jisasa andokale nembo teaipia. ^b

Jisasato Akali Tausene Yau Tupa Tomo Neakale Mayane Oko

Matiyu 14:13-21, Maki 6:30-44, Jone 6:1-13

10 Matili aposolo akali alesa tupa epo peke loto, utupane-mane piape waka-waka peaini tupa pitaka Jisasa lamai-yainipia. Lamai-yaikola, Jisasato wandakali waka tupa ateakale lalu, balana disaipolo tupa angu bala towa atu tano Betesaita lene okona peainipia. 11 Utupane angu peaini tekeko, matili wandakali tupamane Jisasa bala Betesaita tano okona ateya lene ale wato, bala watama epeainipia. Epeai-kola, Jisasato utupane ando wayu epelaiya lalu, Goteto wua puato, pitaka taka ando atalane lo wandakali tupa mana lamaiyu, wandakali siki pelene tupa mo atu yaepia.

12 Ole lea-kola, disaipolo alesa akali tupa Jisasa ateanga epoto, bala lamawuato, wandakali napalene yuu mindina ateyama-ko. Wandakali utupa tano aŋako mindina yandopi, wandakali mindina andaka yandopi, utupanena poto, yakama ulia nolanepi, anda pangulanepi utupane ayia peakalenga, nimbato utupane peakale laa leainipia.

13 Wuane leai-kola, Jisasato balana disaipolo tupa lamawuato, yakamato wandakali utupa tomo neakale maiyapa leaipia. Wuane lea-kola, akali angu (5,000) tausene yaupi mindi ateai oko andoto, balana disaipolo tupamane Jisasa lamawuato, nanimanga betesa yau, pisa lapo angu eyama-ko. Wandakali utupa pitaka-mane tomo neakale, nanimato mindisa poto, tomo kamboto, wandakali utupane pitaka-mane neakale maipe-penepe leainipia. Wuane leai-kola, Jisasato balana disaipolo tupa lamawuato, yakamato wandakali utupane paiyasa yau-yau lo, amunguli pua peteakale lamaiyapa leaipia.

15 Balato leane pua, balana disaipolo tupamane wandakali tupa lamai-yaikola, wandakali tupa pitaka yuunga peteaini-pia. 16 Peteai-kola, Jisasato betesa yau tupapi, pisa lapo okolapopi, utupane moto, ati kenga andaiyu loto, Gote wayu pele loto, tomo utupane konde leaipia. Konde loto, betesa pisa ima utupane wandakali tupa maiyapa loto, balana disaipolo tupanga mayaepia. 17 Balana disaipolo tupamane tomo utupane wandakali peteaini tupa tale pua mayai-kola, wandakali pitaka-mane no embo yainipia. No embo yai-kola, balana disaipolo tupamane akenane yane tupa moto, basaketa nuu alesa tumbi laya yainipia.

Pitato Nimba Mesaya Oko Atele Leane Oko

Matiyu 16:13-19, Maki 8:27-29

18 Alu mindi, Jisasa balana disaipolo tupa towa atu atoto, bala angu pote lo ateaipia. Pote lo koyo piyu, balato utupane tipa puato, wandakali-mane namba andayo api ateya lalainipe leaipia. 19 Wuane lea-kola, utupane-mane balana pii okone yano peyoto, wandakali minditupa-mane nimba ipa peya-maiyane akali Jone atele lalaini leainipia. Wandakali minditupa-mane nimba potopesa akali Ilainja peke loto atele lalaini. Minditupa-mane nimba potopesa akali wamba ateaini tupana waka malinga ika lene mindi atele lalaini leainipia. ^c 20 Wuane leai-kola, Jisasato balana disaipolo tupa lamawuato, utupane-mane wuane lalaini tekeko, yakamato namba api ateya lalainipe leaipia. Wuane lea-kola, Pitato balana pii okone yano peyoto, nimba Mesaya Goteto epeakale leane oko atele okoni leaipia. ^d

Akalina Iwanane Bala Omalu, Ika Lolopeya Leane Oko

Matiyu 16:21-28, Maki 8:31-9:1

21 Wuane lea-kola, Jisasato balana disaipolo tupa lamawuato, matili, ando atalane akali tupapi, pitisa akali kawane tupapi, loo tupana mana andene akali tupapi, utupane pitaka-mane Akalina Iwanane oko bala masia maulai-kola, bala tandaka andane nape-pene guleya leaipia. Akali-mane bala peyo ome lolai-kola, ole tepo penenga Goteto bala malinga ika laya olopeya-ko. Namba Gotena Mesaya oko ateya lo yakamato wandakali mindikipi mindi lamaulaini. Jia wete. Jisasato wuane leaipia. ^e

23 Wuane lalu, Jisasato wandakali ateaini tupa pitaka lamawuato, wandakali tupana wenonga atoto, wandakali minditupa-mane nambapi, nambana pii tupapi, utupane bilipi leyo lape-pene yala wato, namba Jisasana yame ata napeyo lolopeyai. Mindimane wuane lola-kola, matili Ayiane Gote okopi, balana enjole epene wete tupapi, utupanena tai-lene oko Akalina Iwanane okonga yola-kola, Akalina Iwanane oko bala epolopeya. Okone angi, balato wandakali okone balana yame ateya lape-pene yala ola-kola, wandakali okone bala katulo Gote towa saka atapowa ata napulu-peyako. Wandakali mindimane yuu okona minditaka eya tupa pitaka mialu, saka atapowa ata napeando, matili balana minditaka utupane pitaka-mane anu puato, bala moyolo-peyape. Wandakali mindi bala nambana yame ateando, namba towa yanda piyaini akali tupamane katulo bala peyo ome lolopeyai. Wandakali mindi bala omolowane nembo toto, nambana yame ata napeando, bala epene saka atapowa ata napulu-peya tekeko, wandakali mindi bala nambana yame ateya nembo toto, wandakali-mane bala peyo ome leando, wandakali okone bala saka atapowa atolopeya. Tene okonena, wandakali mindimane namba polowa okona epokale nembo teando, bala tane nembo natene, ole dindi lo kenda-pene balanga epola tupa balana ita malamanda gulo aiyu, namba watama ipupe-pene. ^f 27 Nambato pii enene mindi yakama langeyo. Wandakali andipa ateyai tupana minditupa wamba ini oma napene andolai-kola, Goteto pitaka taka moyo ando atolanga andolopeyai leyo leaipia.

Jisasa Bala Waka Guleane Oko

Matiyu 17:1-13, Maki 9:2-13

28 Jisasato pii utupane lo koyo pea-kola, ole kitupasapi mindi peaipia. Pea-kola, matili balato Pita, Jemesa, Jone ima utupane atu aiyu yuu wangiane mindina pote lolo peaipia. Balato pote lo atea-kola, akali tepo utupane yakama limu palu ateainipia. Limu palu ateai-kola, Jisasana lee-ingapi tii wete pea-kola, balana tona peane tupa ake wete pea-kola, bala waka guleaipia. Waka gulea wete, Mosesa, Ilainja-la okonelapo ati kenga tii-pene oko towa atu epoto, Jisasa towa atu pii lalawa puato, matili Jisasa bala Jutusaleme poto, omalu, ika lalu, ati kenga polane okona pii lo ateainipia. Pii lalawa pua ateai-kola, Pita, Jemesa, Jone ima utupane yakama lee toto andeai-kola, Jisasana tii-pene okopi, lapo akali bala towa atu ateapele okolapopi, utupane andeaini-pia. ^g

33 Akali okonelapo liyamba Jisasa tepa alu, poyale ateapi wete, matili anu pulupeya nembo natene, Pitato Jisasa lamawuato, Ando Atalene Akali, nanima yuu okona ateyama-kola, kuai leya-ko. Nanima tepo akali tupamane aiyakame mindi nimbana, mindi Mosesana, mindi Ilainjana, aiyakame tepo pingimakale leaipia. 34 Pitato pii okone lo atea-kola, mole mindi epoto, akali utupane yame peyoto, ombo ya-kola, Pita, Jemesa, Jone ima utupane-mane yukuwa ateainipia.

35 Yukuwa ateai-kola, mole okonena tombenesa ato pii mindi leane okomane loto, akali oo ateya oko bala nambana iwanane oko leaipia. Balato nambana piape pingeakale loto, nambato bala ata lewaneko. Yakamato balana pii oko ale alapape leaipia. ^h 36 Wuane lea-kola, Pita, Jemesa, Jone ima utupane-mane Jisasa bala angu ateanga andeaini-pia. Utupane-mane mangene utupane pitaka andeaini tekeko, okone angi teke utupane-mane minditaka lee-mane andeaini tupa wandakali mindikipi mindi lamai napeainipia.

Jisasato Sipitisa Koo Atene Iwana Mindi Mo Atu Yane Oko

Matiyu 17:14-21, Maki 9:14-29

37 Anate-lene Jisasa, Pita, Jemesa, Jone ima, utupane yuu wangiane okone tepa alu, puu nena leai-kola, wandakali kambua amunguli peaini tupamane Jisasa malanda yainipia. 38 Malanda wato, wandakali utupane towa atu ateane akali mindimane pii taimane loto, tisa, nimbato nambana iwanane oko andola leaipia. Bala nambana andopane mindiki oko angu ateya. 39 Sipitisa koo mindimane bala mina duli leya-kola, bala kalae lo apupu teke mandu atalane. Sipitisa koo okonemane iwana oko ini tepa naene, balana umbaini minu koyalu palane. 40 Balato wuane piyane okonena, nambato nimbana disaipolo tupamane sipitisa koo okone peyo wata alapale lo tee lalo tekeko, utupane-mane sipitisa koo okone katulo peyo wata napiyai leaipia.

41 Wuane lea-kola, Jisasato utupane lamawuato, wandakali yame koo andipa ateyai tupa yakamato kuai lo nembo natene, mana koo tupa minuto, Gote lo bilipi leyama nayu na-lalaini lea. Ole aki-tupi namba yakama towa atokale yape. Dee, ole aki-tupinga namba yakama towa atu atoto, yakamana kenda-pene tupa awua ata gukale yape leaipia. Wuane lalu, balato akali okone lamawuato, nimba iwanane oko atu aiyu ipu leaipia.

42 Iwana okone epoyale epea-kola, sipitisa koo okomane bala taimane mo malawai loto, yuunga mo lomba tepa ya-kola, bala peango-ngo peya-yene yaepia. Wuane pea-kola, Jisasato sipitisa koo okone laya loto, nimba iwana oko tepa alu, puu leaipia. Sipitisa koo okone pea-kola, Jisasato iwana okone mo atu yoto, nimba ayiane towa pulupa leaipia. 43 Jisasato iwana okone mo atu ya-kola, wandakali pitaka-mane Gotena tai-lene andane oko andoto, moko wete leainipia.

Akalina Iwanane Bala Omalu, Ika Lolopeya Lo, Ole Lapone Leane Oko

Matiyu 17:22-23, Maki 9:30-32

44 Jisasato piape kambua andane pea-kola, wandakali pitaka-mane nembo kambua teainipia. Nembo kambua teai-kola, Jisasato balana disaipolo tupa lamawuato, pii nambato leyo utupa yakamato pailo ale wato, wayumane nembo tatawa atalapape. Matili akali mindimane Akalina Iwanane oko ene pituto, akali waka tupana kiinga malupeya leaipia. ⁱ 45 Jisasato wuane leane tekeko, pii okonena tene oko too pene guleaipia. Tene okonena, utupane-mane tatake wato, balato aki nembo toto, wuane leyape nembo nateaini tekeko, utupane-mane bala tipa puyale yuku yainipia. ^j

Akali Gene Andane Wete Yene Api Ateyamape Leaini Oko

Matiyu 18:1-5, Maki 9:33-37

46 Alu mindi Jisasana disaipolo tupamane nanima disaipolo ateyama tupana akali gene andane wete yene api ateyamape loto, yakama teke-teke pii yanda pua ateainipia. ^k 47 Pii yanda pua ateai-kola, Jisasato utupanena nembo-tene okone andoto, andopane mindi kii minu atu epoto, bala towa atu ateapele-pia. 48 Atu atoto, Jisasato balana disaipolo tupa lamawuato, akali mindi bala yakama pitakana pangosa ateando, bala yakamana akali andane wete oko atolopeya leaipia. Wandakali mindimane namba lo nembo toto, andopane okopene mindi moyando, balato namba moyola-kola teke pulupeya. Wandakali mindimane namba moyando, balato namba puu leane Gote oko moyola-kola teke pulupeya leaipia. ^l

Yakama Towa Yanda Na-piyaini Tupa Yakamana Amene Atolopeya Leane Oko

Maki 9:38-40

49 Okone angi, Joneto Jisasa lamawuato, Ando Atalene Akali, nanimato andalama-kola, akali mindimane nimbana gene oko loto, sipitisa koo tupa peyo wato atala tekeko, bala nanima towa atu ata na-piyamane. Tene okonena, nanimato bala lamawuato, nimbato Jisasana gene oko loto, sipitisa koo tupa peyo watolene lalama leaipia. 50 Joneto wuane lea-kola, Jisasato bala lamawuato, akali mindimane yakama towa yanda pua ata napeando, balato yakama moyalane-ko. Akali mindimane piape epene mindi pua ateando, yakamato jia nalene, balato wuane peakale lo ando kondalapa leaipia. ^m

Jisasa Yatawa Pali Napimakale Leaini Oko

51 Jisasa bala ati kenga peke lolane oto oko mandaka epea-kola, bala nembo mindiki paliyu, Jutusaleme poyale ato, akali minditupa-mane bala epeya lo lamai-yakale ingane pulupa leaipia. Wuane lea-kola, akali utupane-mane Jisasana tomo nolanepi, anda pangulanepi, utupane mandeke puyale, Samatiya yame tupana tano mindina ingane peainipia. 53 Wuane tekeko, Jisasa balana disaipolo tupa towa tano okonena peakaiyu leai-angi, Samatiya yame wandakali utupane-mane Jisasa bala Jutusaleme poyale epeya nembo toto, bala yatawa pali napimakale leainipia.

54 Wuane leai-kola, Jemesa, Jone-la okonelapo Jisasa ateanga poto, bala tipa puato, Akali Andane, wandakali utupane ita-mane teakalenga, nalipato ita tapeta mindi ati kenga ato epeakale lapape leapelepia. ⁿ 55 Wuane leapi-kola, Jisasa okonelapo anda-peke lo laiya loto, liyambato wuane lolapele leaipia. 56 Wuane lalu, Jisasa balana disaipolo tupa towa yuu okone tepa alu, tano waka mindina peainipia.

Jisasa Wato Minulane Mana Oko

Matiyu 8:19-22

57 Jisasa balana disaipolo tupa towa asini peai-kola, akali mindimane bala lamawuato, namba nimbana disaipolo atoto, yuu nimba pole tupa pitakana namba atu bakale leaipia. 58 Atu bakale lea-kola, Jisasato bala lamawuato, peango anatope tupana pangulane yuli tomba-yene yalane. Eka tupa paliyaini anda atalane tekeko, Akalina Iwanane oko oto mo, kawa yolane panda mindi naeya leaipia.

59 Wuane lalu, Jisasato akali waka mindi lamawuato, nimba namba watama ipu lea-kola, akali okonemane lapeke loto, Akali Andane, nambana ayiane oko wamba ini bulupane mali piyu, matili namba nimba watama epokale leaipia. 60 Wuane lea-kola, Jisasato akali okone lamawuato, wandakali omene gulo atalaini tupamane yakamana yangone omene tupa mali peakale lo ando kondalu, Goteto pitaka taka ando atalane loto, nimbato pii okone lo tawe yolo puu leaipia.

61 Okone angi teke, akali waka mindimane Jisasa lamawuato, Akali Andane, matili nambato nimba pele okona watama epokale tekeko, wamba ini nambana yame tupa atalapape lolo pokale dee leaipia. ^o 62 Wuane lea-kola, Jisasato bala lamawuato, wandakali mindimane Gotena piape oko puape, kondowape lo, mini lapo palu ateando, balato Gotena piape oko kuai lo napulu-peya leaipia.